بو مريوم
atawya@gmail.com
تطلعات برجوازية
المواطن الخيشي المفروض ما تكون له تطلعات برجوازية بعد 15 من الشهر.
في يوم مغبر من نص الشهر ما ادري شنو دهاني وقررت اغير من الرقي واشتري منجا.. ملينا كل يوم رقي
ومو اي منجا.. لا منجا الفونصو
طبعا ماكو بجيبي الا 10 دنانير دخلت بكل ثقة وانا اعتقد ان السعر اغلى من الرقي شوي
اذا كثر الكيلو 400 فلس
اشوف الصندوق، يا للهول
ثمان دنانير! والله لو الفونصو نفسه وكلني المانجا ما دفعت فيها ثمان دنانير
شفيه الرقي؟
على فكرة
يقولون ان أكل المنجا بعد الغدا من الظاهر الدخيلة.
---------------------------------------------------
قانون نيو أنطم
صحيح في قانون إن اللي يتكلم عن حل المجلس بيسجنونة؟
يعني تخيل باجر مسجون ويسألونك..
شنو تهمتك حشيش؟
لا والله حل
ويصير في حل وحل مع سبق الاصرار والترصد
واذا بتتبلى على واحد بلغ عنه..
مهرب حل، أقصد يتكلم عن الحل
يبا إحنا انتخبناكم لمزيد من الحريات مو عشان تعلمونا شلون نتكلم.
----------------------
خشيم الفار
شنو اول شيء يتعلمه الياهل الكويتي؟
مو كلمة يبا.. ولا يمه
أول شي يتعلمه حركة خشيم الفار..
واهي مقياس لتطور الطفل
حركة لطيفة وتضحك.. بس ما منها اي فايدة
نوابنا مع وعودهم الانتخابية
يسون لنا مثل اليهال
يلا يا ناخبين حركة خشيم الفار..
واحنا نسويها.. ونضحك واهم يضحكون
والمحصلة ماميش
وين وعودكم.. تنمية وتنمية
وآخرها لجنة ظواهر سلبية؟
------------------
صيف سويسري بارد..بالتلفزيون
ليش بعض الكتاب الله يهداهم يتعمدون يحرونا؟
إحنا الصامدين في صيف الكويت
الكاتب مسافر أوروبا ولا ديرة من هالدير الباردة
وكل يوم يصكنا مقال عن روعة الطبيعة وعن برودة الجو
ارحموا المصيفين في الكويت
أنا قررت أسوي مثلهم
بس بكتب مقالي من المباركية
وعن جولاتي ومشترياتي الفولكلورية من سوق الحريم
وعن التبطح على الشواطئ الرملية الناعمة
يا حلو البحر الظهر..
إذا انسدحت.. بس ناقص يرشون على ظهرك شوية سمسم.
--------------------
ترويع سياحي
على طاري الصيف والتصييف
الله يرحمك يا صالح شهاب.. حفلات ووناسة بالحدايق
وشوية طيران..
وآخرتها فلم بالهواء الطلق
عايلة عشرين نفر يطلعون ويغيرون جو ما تكلفهم الطلعة شي
اللحين وين تطلع العيال؟
السينما.. ثلاث اطفال وأنا وأمهم.. 15 دينار تذاكر
نفيش و و عصاير خمسة دنانير
عقبها لازم عشاء مو اقل من عشرة
يعني ثلاثين دنيار أقل شي
وآخر الشهر نقزرها فلافل وبساط على البحر.
----------
الصورة : مشاكسات مدوّن