اشفيهم نوابنا الأفاضل؟
ثلاثة أرباع تصريحاتهم عن اقرار الخمسين.. وما راح نتنازل عن الخمسين
يبا والله ما نبيها
والله نتوب..
مو من كثر فلوسنا وأملاكنا يا الله من فضلك
بس هالخمسين اذا اقرت راح ندفعها دبل.. ويمكن ثلاث دبلات..
الحكومة ما قصرت.. النواب طلبوا خمسين.. اهي عطتنا
بس الاسعار زادت الضعف.. وردينا مثل ما كنا..
لا، ويمكن افقر..
المعاش قبل يصمد لي عشرين الشهر
الحين من 15 الشهر تدور الخردة اللي بالطفاية
يعني اذا الحكومة سوتها وقرت الخمسين.. يمكن ينزل لك الراتب بالناقص
يعني تروح البنك بدال لا تحسب فلوس تسوى ايداع
ماذا دهاهم؟
على طاري الانواط..
تذكرون الاخضر؟ كان يهز هز
اسم على مسمى..
تحطه بالمخبة اللي فوق وتطلع شوي منه..
وتمشي محد يكلمك..
مسكين نوطنا الاحمر.. اذا دشيت الجمعية حدة رقيتين وعلك
واذا فرع الخضار مسوي مهرجان يمكن تحصل كرتون تفاح فوق البيعة
مضاربات بورصوية بالخمس
شلون تعرف الخيشي من المخملي؟
لي تلاقوا اثنين خيشين ما تسمع منهم الا اسعار البسمتي والخرفان..
وممكن تحصل معلومات سرية عن ارخص محلات تبيع العيش..
وأسعار العيش بالبورصات العالمية..
لو انا من الحكومة.. بدال هالاستثمارات الخارجية بالذهب والفضة والاسواق العالمية
اشتري كم مزرعة عيش بسمتي.. على كل كم مزرعة خرفان استرالية
واستثمر بمصنع اجار ومعبوج بالوفرة..
أتوقع ثلاثة اربع مشاكل البلد راح تختفي
حفلة على الخازوق
بعد دراسة مستفيضة.. وقراءة لمعطيات الساحة..
توصل لاستنتاج مهم..
استنتاج ممكن يدفع عجلة التنمية الى الامام ويسلط الضوء على القطاعات المهمة بالبلد
تبي اي قضية منسية تتصدر الساحة؟
سو فيها حفلة..